Liturgia Hispano-mozárabe. Sacramentos. Matrimonio

ITEM ORDO DE SECUNDIS NUBTIIS (1)

Deus, qui multimoda subsidiorum remedia fragilitati humane et propagationis beneficia confers et incremento propagande prolis adtribuis, ut natura non defraudaretur a semine, quod germinata propago crescat in progenies, sic temporibus priscis Ruth Moabitidam benedixisti.
R/. Amen.

Sic in novissimis per Apostolum tuum secunda matrimonia concessisti. Da eis procreandorum filiorum unanime desiderium, et aufer carnalis libidinis voluptuosum appetitum.
R/. Amen.

Sit eis ut fuit Ruth suboles ex amore, non luxuria ex ardore.
R/. Amen.

Prosequatur hanc illa benedictio, que illam subsecuta est.
R/. Amen.

Ut faciat Dominus hanc mulierem, que ingreditur domum tuam, sicut Rachel et Lia, que edificaverunt domum Israhel.
R/. Amen.

Sit exemplum virtutis, et habeat celebre nomen in Ecclesia Dei vivi.
R/. Amen.

Benedictio eiusdem.

Te deprecamur, Domine sancte, Pater eterne, omnipotens Deus, super hos famulos tuos Illos, quos ad secundas nubtias vocare iussisti, qui per nostram licet indignam precem, tuam desiderant percipere benedictionem. Tribue eis, Domine, fidele consortium caritatis et copiam tue benedictionis: et concede huic famule tue Illi, ut induat caritatem Sarre.
R/. Amen.

Sapientiam Rebecce, amorem Rachelis, gratiam et castitatem Susanne.
R/. Amen.

Tribus huic famulo tuo Illi benedictionem tuam, sicut benedixisti, Abraham, Isaac et Iacob.
R/. Amen.

Descendant, Domine, super hos famulos tuos Illos benedictio tua, et gratie tue donum, sicut descendit ros et pluvia super faciem terre.
R/. Amen.

Ut ita eorum corda vel corpora tua benedictio circumfluat, qualiter manus tue sentiant tactum, et per Spiritum Sanctum percipiant gaudium sempiternum.

Pater noster.

Benedictio.

Benedic, Domine, hos famulos tuos Illos, quos secunda coniugalis velatio ad instar apostolici precepti digno federe matrimonii iungit. Habeant meritum prime coniunctionis.
R/. Amen.

Sit in eis virtus continentie prolis propter prestolatam progeniem.
R/. Amen.

Mereantur coniugatorum patriarcharum ditari meritis et maneat in eis pax, mansuetudo et lenitas sanctitatis.
R/. Amen.

Ut, in unum spiritum atque corpus gratia meritorum redacti, exoptati gaudia consequantur coniugii.
R/. Amen.

(1) Marius F�rotin, OSB. Le Liber Ordinum, etc. París 1904. Reed. Roma 1996, col. 434-435.