Beata nobis gaudia
Anni reduxit orbita,
Cum Spiritus Paraclytus
Effulsit in Discipulos.

   Ignis, vibrante lumine,
Linguae figuram detulit;
Verbis ut essent proflui,
Et charitate fervidi.

   Linguis loquuntur omnium:
Turbae pavent Gentilium:
Musto madere deputant,
Quos Spiritus repleverat.

   Patrata sunt haec mystice,
Paschae peracto tempore;
Sacro dierum numero,
Quo lege fit remissio.

   Te nunc Deus piissime,
Vultu precamur cernui,
Inlapsa nobis caelitus
Largire dona Spiritus.

   Dudum sacrata pectora
Tua replesti gratia;
Dimitte nunc peccamina,
Et da quieta tempora.

   Anni peractis mensibus,
Tanta recurrunt gaudia;
Votisque dudum credulis
Optatus advenit dies;

   In quo Spiritus Domini
Terram replevit gaudiis:
Coelestis adventus sui
Mundo decurrunt lumina.

   Quod est probatum testibus;
Apostolorum vocibus;
Cum sint diversis oribus
Vanis locuti gentibus.

   Tanto redempti munere,
Patris, et Nati Spiritui
Juges agamus gratias,
Deo perenni in saecula.

   Gloria tibi Trinitas
Aequalis una Deitas,
Et ante cuncta saecula,
Et nunc, et in perpetuum.
   Amen.