Jam legis umbra clauditur,
Novumque Phasse prodiit,
Cum vera lux in vesperum
Mundi suborta promicat.

   Hinc Christe rex post biduum
Coenae litas convivium,
Quo pascha pridem mysticum
In pascha nostrum vertitur.

   Audi fidelium preces,
Qui traditorem passus es;
Hac nocte nos inlumina,
Carnem lava, cor praepara.

   Ardor tuae dulcedinis
Interna nostra concremet;
Fides paratos innovet,
Opusque ad regnum vocet.

   Ut, suavitate gratiae
Hinc advocati, in crastinum
Inebriemur poculis
Tui sacrati sanguinis.

   Deo Patri sit gloria,
Ejusque soli Filio,
Cum Spiritu Paraclito,
Regnans per omne saeculum.
   Amen.