Noctis tempus jam praeterit,
Jam gallus canit, vivis
Gallo canente spes reddit;
Aegris salus refunditur.

   Somno gravati surgite,
Cordis reatum paudite,
Jesuque laudem dicite,
Qui nos redemit sanguine.

   Non ut fallax discipulus,
Qui pacem ferens osculo;
Et dolum tenens pectore,
Turbis Magistrum tradidit.

   Jesus captus ab impiis:
Disperguntur discipuli:
Locutus est ut Dominus
Nocte ferens scandalum.

   Jesus suis discipulis,
Dum crucem suam praedicat,
Negari sese praemonet;
Petrus facturus abnegat.

   Petrus fervens spiritu
Sequitur in praetorio;
Sed agnitus discipulus,
Negavit Christum Dominum.

   Petrus jurabat omnibus:
Se non novisse hominem:
Vox namque galli resonat,
Et Petrus culpam meminit.

   Jesus, dum Petrum respicit,
Fidem Petri dum suscipit,
Petrusque, flendo, recipit,
Quod ante paulo amiserat.

   Et nos precamur, Domine,
Fidem Petri recipere,
Fidemque Apostolicam,
Flentes pro nostro crimine.

   Gallo canente venimus;
Laudes Deo persolvimus:
Confessionis propriae
Dantes ei veram fidem.

   Abscede princeps doemonum
Cum noxiis phantasmatum:
Jam nos piavit veritas;
Jam probra tersit charitas.

   Hinc te, Deus, deposcimus,
Ut pervagantes doemonas
Signo salutis destruas;
Nos a pavore libera.

   Hac noctis hora praescius
David futurae gloriae
Deo preces multiplicat,
In matutinis excubans.

   Hac nos oportet surgere
Illo vigore corporis,
Illoque voto spiritus,
Quo expiemur sordibus.

   Exurge, nobiscum Deus,
Laudes tuorum suscipe,
Lustrando corda lubrica
Lucis novellae gratia.

   Deo Patri sit gloria,
Ejusque soli Filio,
Cum Spiritu Paraclito
Regnans per omne saeculum.
   Amen.