Christe immense, Dominator sancte,
Custodi plebem, quam tu redemisti
Sanguine sacro tuo pretioso;
      Ipse salvasti.

   Claritas fulget, Dominusque fecit,
In Bethania ad Lazarum venit,
Quem suscitavit, et gloriam suam
      Manifestavit.

   Maria autem domi retenta,
Quem expectabat; pietas immensa
Illi occurrit, et annuntiavit
      Sororque Martha.

   Magister adest. Occurrunt sorores,
Et lachrymantes, Christum confitentes
Sic meruerunt, ut viderent fratrem
      Suum resurgentem.

   Ad monumentum exlamabat Jesus:
Lazare veni, Dominusque tecum.
Ille surrexit, et omnis caterva
      Ibi convertitur.

   In Samaria ut homo sitivit,
Et mulieri peccata dimisit,
Coecus enim natus lumen magnum
      Vidit in Siloe.

In Samaria fecit confitentes,
In Bethania Lazarum surgentem,
Surdos audientes, et mutos loquentes,
      Quos visitavit.

   Gloria Patri, Trino Sempiterno
Gloria Christo, Spirituique Sancto:
Praedicet Trinum pia voce nomen
      Omne per aevum.