Auctor luminis, Filius Virginis,
Paterque Matris, Filiusque Patris,
Qui coeco sedenti stipem petenti
      Lumen dedisti.

   Sedensque caecus tenebris oppressus,
Quem voluerat sic nasceretur coecus,
In quem virtus sua omnibus credentibus
      Comprobaretur.

   Gaudetque coecus, lumine recepto,
Quem visitabat Medicus excelsus,
A Patre dilectus, ut ablueretur
      Mundi delictum.

   Plebs Hebraeorum simulque dixerunt:
Parentes ejus veniant, per quos quaesierunt:
Qui coecus est natus, a cujus virtute est
      Inluminatus.

   Parentes autem Hebraeorum fatentur:
Ex utero matris coecus fuit natus:
Aetatem habet, ipsum interrogate;
      Dicat veritatem

   Confitetur coecus, qui fuerat sanatus:
Ad me accessit Propheta magnus,
Cujus virtute, oculo, et corde sum
      Illuminatus.

   Fecit qui lutum de sancto sputo,
Tegmen oculorum linuit ac luto,
Jussit lavari Siloe, piscina me
      Clarificavit.

   Gloria Patri, Trino sempiterna
Gloria, Christo, Spirituique sancto:
Praedicet Trinum pia voce nomen
      Omne per aevum.
   Amen.