Clange lyram Zacharias
Sacerdotum Princeps,
Cui copulata conjunx
Ab Aaron filiabus
Thalamorum inhaerebat
Solita praenuntiis.

   Operibus Sanctiores
Praepollebant ceteris;
Ac synceris in mandatis
Incedebant Domini,
Et, nulla prole conlata,
Pergebant ad senium.

   Mox enim hora refulsit
Incensorum tempore,
Suetum gestabat vates
Ignem in thuribulis
Sacris deferens odorem
Nectareum atriis.

   Audit coelitus affatum,
Et sonorum Nuncium,
Cujus candore praeviso,
Tremor vatem inruit,
Quem blandis robustiorem
Reddidit sermonibus.

   Ecce juncta thorum tibi
Conjunx parit sobolem;
Quam protinus nuncupabis
JOANNEM vocabulo:
Cujus totum praedicatur
Per Orbem Nativitas.

   Hic coram Domino Magnus
Matris infra uterum
Repletus Spiritu Sancto,
Praecursurus Dominum;
In virtute, spirituque
Praemissurus Heliae.

   Talia, Sacer; e contra
Sic respondit Angelo:
Ecce jam nostra sub annis
Emarcuerunt viscera:
Ac vetulis denegatur
Sensibus posteritas.

   Ego sum missus ab Astris
Angelorum socius;
Et tu Divinis videris
Praeceptis incredulus,
Propter quod carens loquela
Eris tacens labiis.

   Temporibus jam completis,
Natus infans cernitur,
Cujus nomen praenotavit
Pater in volumine;
Vinculo soluto linguae
Conlaudavit Dominum.

   Gloria, et honor Deo
Usquequaque altissimo,
Una Patri, Filioque,
Inclyto Paraclito;
Cui laus, et potestas
Per aeterna saecula.
   Amen.