O Petre, petra Ecclesiae,
Isto beatus nomine,
Quo Petrus a Christo Petra,
Non Petra Christus a Petro.

   Tu es Petrus, qui Filii
Confessor es primus Dei,
Hinc primus in membris manens;
Ob quod Cephas vocatus es.

   Adest dies, quo Romula
In urbe consecratus es;
In quo Cathedrae nobilis
Scandens Thronum adtolleris:

   Conlata ergo gloriae
In te potestas affluens,
Ligata solvat crimina,
Portasque Averni obstruat.

   Hinc Pastor ut piissimus,
Oves guberna creditas;
Intus forisque pervigil,
Ne subruamur, pretege.

   Et clave illa coelica
Solvens catenas criminum,
Illic reos inducito,
Quo clarus extas Janitor.

   Ut cum polorum Principi
Recisa membra jusseris,
Sit Trinitati gloria
Per cuncta semper saecula.
   Amen.